Styttist í markametið
Son Heung-min er orðinn leikjahæsti leikmaður í sögu suður-kóreska landsliðsins eftir að hafa spilað í vináttulandsleikjum gegn Brasilíu og Paragvæ.
Hann er núna með 138 landsleiki að baki og bætti met Cha Bum-kun og Hong Myung-bo sem voru jafnir í 136 landsleikjum.
Hong er núverandi landsliðsþjálfari Suður-Kóreu og var Son verðlaunaður fyrir þetta afrek fyrir landsleikinn gegn Paragvæ.
Cha mætti á landsleikinn og afhenti Son sérstaka viðurkenningartreyju fyrir að bæta leikjametið. Son er 33 ára gamall og er aðeins fimm mörkum frá því að jafna Cha sem markahæsti leikmaður í sögu landsliðsins.
Cha skoraði 58 mörk fyrir Suður-Kóreu og er Son kominn með 53 mörk.
Athugasemdir
