Rúnar Kristinsson þjálfari Fram var ánægður með úrslit dagsins eftir að liðið hans vann Vestra 1-0.
Lestu um leikinn: Fram 1 - 0 Vestri
„Frábær sigur, við mikinn hita og þreyta í báðum liðum. Það voru erfiðir bikarleikir fyrir þremur dögum. Þannig það vantaði svona aðeins kraft í bæði liðin, en þetta var ágætis fótboltaleikur. Ég held að við höfum bara gert rétt, og hittum á réttu taktíkina og náum að skora á undan þeim. Það er erfitt að skora á þá, ég held að þetta sé bara þriðja markið sem þeir fá á sig í deildinni. Þetta var leiðin, það er að skora fyrst og reyna að bæta við, en að sama skapi halda aftur af þeim."
Framarar spiluðu mjög góðan varnarleik í dag, og fyrir þremur dögum þegar þeir mættu KA í bikarnum skoruðu þeir fjögur mörk og sýndu góðan sóknarleik. Það er þá bara að koma þessum hlutum saman.
„Þetta er búið að vera erfið byrjun og við höfum átt góða sigra, en höfum líka átt slæm töp. Við þurfum að finna þetta jafnvægi á milli. Við getum varist vel, þessir síðustu tveir leikir, sýna hvað þarf til að ná úrslitum. Leikmenn átta sig á því hvað þarf til þess að vinna fótbolta leiki. Það er ekki alltaf bara að spila einhverjar flottar hælspyrnur og gera eitthvað flott, stundum þarf bara að gera hlutina einfalt. Hlaupa og berjast, og hafa þessi grunngildi í lagi líka. Við höfum náð að halda því til haga bæði í dag og síðasta leik.
Viðtalið má sjá í heild sinni í spilaranum hér fyrir ofan.
