„Mjög góð byrjun, mjög góð byrjun. Ekkert endilega bara markið sem er auðvitað alltaf jákvætt en heilt yfir vorum við að gera mjög vel, mjög svekkjandi að missa þetta niður og þurfa að tapa þessum leik 4-1.“ sagði Andri Lucas Guðjohnsen, landsliðsmaður Íslands, eftir 4-1 tap í Wales.
Lestu um leikinn: Wales 4 - 1 Ísland
Hvað fór úrskeðis í dag eftir að hafa tekið forystuna snemma leiks?
„Það er góð spurning, erfitt að segja. Við vorum með ákveðið leikplan fyrir leik sem við ætluðum að nýta með mig og Orra tvo stóra frammi. Það breytist svolítið hratt þegar hann þarf að fara meiddur af velli og Mikael Egill kemur inn. Leikplanið breytist þvílikt mikið sem við vorum ekki búnir að undirbúa okkur fyrir. Svo meiðast menn og það koma skiptingar. Við missum svo stjórnina á leiknum rétt fyrir hálfleik. Margt sem spilar inn í sem verður til þess að við missum þetta frá okkur.“
Andri Lucas segist vera sáttur með sóknarleikinn í dag.
„Við vorum að komast í mjög góðar stöður og fengum fullt af færum en þetta féll ekki með okkur í dag. Við hefðum getað skorað fleiri. Tilfinningin er samt að við erum mjög sáttir með sóknarleikinn okkar. Það að við erum að komast í þessar stöður er mjög jákvætt fyrir okkur.“
Breiddin í landsliðinu er góð fram á við þrátt fyrir að það vantaði nokkra lykilmenn.
„Við erum með marga mjög góða og öðruvísi leikmenn sem er mjög jákvætt fyrir okkur sem lið og sem hóp.“
Hvernig finnst Andra þróunin á landsliðinu vera undir stjórn Age Hareide?
„Ég persónulega hef liðið vel inni á vellinum og sérstaklega núna í seinustu leikjum með Orra upp á topp. Mér finnst við allir vera búnir að taka stórt skref með félagsliðum og landsliðinu.“
Viðtalið við Andra má sjá í heild sinni í spilaranum hér að ofan.
