Heimild: Morgunblaðið
Páll Kristjánsson, formaður KR.
Páll Kristjánsson, formaður KR, fagnar ákvörðun KSÍ að stefna að því að klára mótið en liðið er í fimmta sæti Pepsi Max-deildarinnar og þremur stigum frá Evrópusæti.
„Það er skoðun okkar KR-inga að það hefði ekki verið tímabært að gefa út neinar yfirlýsingar um að aflýsa mótinu á þessum tímapunkti," sagði Páll í samtali við Morgunblaðið.
„Í fyrsta lagi þá trúðum við því aldrei að mótinu yrði slaufað og í öðru lagi, án þess að vera með of miklar yfirlýsingar, hefðum við aldrei setið þegjandi og hljóðalaust undir því ef mótinu yrði slaufað."
Samkvæmt reglugerð KSÍ þarf mótið að klárast fyrir 1. desember en Páll segir við Morgunblaðið ekki skilja hvers vegna sú dagsetning sé heilög.
„Ég skil ekki alveg þessa dagsetningu, 1. desember, af hverju hún er svona heilög, þar sem við erum eflaust sú þjóð í heiminum sem hefur einna mesta svigrúmið til þess að klára landsmót í fótbolta. Við trúum því og treystum að mótið verði klárað og við munum gera kröfu á það á öllum stigum málsins," segir Páll.
Athugasemdir
