Eftir leikinn gegn Wales.
Telma Ívarsdóttir var mjög góð í sínum fyrsta keppnisleik með íslenska landsliðinu gegn Wales á föstudagskvöld. Telma hefur lengi verið hluti af hópnum en þetta var hennar fyrsti keppnisleikur.
Telma, sem er á mála hjá Breiðabliki, fékk tækifæri til að byrja í markinu og nýtti sér það vel. Hún var örugg í sínum aðgerðum og stóð sig með prýði.
Glódís Perla Viggósdóttir, landsliðsfyrirliði Íslands, var spurð út í Telmu eftir leikinn og hrósaði markverðinum.
„Hún var geggjuð. Það heyrist í henni allan tímann og hún var örugg í sínum aðgerðum," sagði Glódís og hélt áfram: „Það var ótrúlega gaman fyrir hana að hafa spilað vel í dag, að hafa labbað inn í þetta hlutverk, tekið það og eignað sér það."
Þorsteinn Halldórsson, landsliðsþjálfari, þekkir Telmu vel eftir að hafa þjálfað hana bæði í landsliðinu og í Breiðabliki. Hann var virkilega ánægður með hana í leiknum gegn Wales.
„Við erum með fína möguleika í stöðunni, en ég mat það bara svo að hún væri klár í þetta. Ég var mjög ánægður með hana, hún var örugg í því sem hún var að gera og hún gerði það vel. Hún greip inn í fyrirgjafir og varði þessi tvö skot sem komu á markið."
Það er líklegt að Telma verði áfram í markinu þegar Ísland mætir Þýskalandi í Þjóðadeildinni annað kvöld.
Hér fyrir neðan má sjá viðtal sem var tekið við Telmu fyrir æfingu í Düsseldorf í dag.
Athugasemdir
