Rúnar Már Sigurjónsson og félagar í FC Voluntari í Rúmeníu fara ekki í Sambandsdeildina eftir tap liðsins í dag.
Liðið mætti Craiova í umspili um sæti í Sambandsdeildinni í dag en Voluntari tapaði eftir vítaspyrnukeppni. Craiova komst í 3-0 en Rúnar átti stóran þátt í magnaðri endurkomu.
Voluntari minnkaði muninn á 78. mínútu. Rúnar skoraði úr vítaspyrnu sjö mínútum síðar og lagði upp jöfnunarmarkið þegar sjö mínútur voru komnar framyfir venjulegan leiktíma. Ekkert mark var skorað í framlengingunni og grípa þurfti til vítaspyrnukeppni.
Rúnar skoraði úr fyrstu spyrnunni en liðið tapaði að lokum 5-4 í vítaspyrnukeppninni.
OB enn í möguleika á Sambandsdeildinni
OB hélt vonum sínum á lofti að komast í Sambandsdeildina þegar liðið sigraði Horsens í Íslendingaslag í dönsku deildinni í dag. Leikurinn endaði 2-1 en Aron Elís Þrándarson kom inn á sem varamaður hjá OB og Aron Sigurðarson var í byrjunarliði Horsens.
Horsens er í fallsæti fyrir lokaumferðina og þarf nauðsynlega á sigri að halda gegn Íslendingaliði Lyngby sem berst einnig fyrir lífi sínu í deildinni.
OB er stigi á eftir Midtjylland í baráttunni um Sambandsdeildarsæti þegar liðið á einn leik eftir en Midtjylland á leik til góða.
Öster vann Landskrona 2-1 í 9. umferð sænsku deildarinnar en þetta var fyrsti sigurinn í síðustu fimm leikjum en liðið hafði byrjað tímabilið á fjórum sigrum.
Alex Þór Hauksson var í byrjunarliði Öster í dag. Srdjan Tufegdzic stýrir liðinu.