Gummi Hreiðars á fréttamannafundi.
Markmannsþjálfarinn Guðmundur Hreiðarsson segir að Hannes Þór Halldórsson, markvörður Íslands, sé í fínu standi fyrir leikinn gegn Kasakstan á morgun.
,,Staðan er góð á honum sem og Ingvari og Ögmundi. Frá því að við vorum í Flórída er Hannes búinn að spila fimm leiki. Auðvitað væri æskilegt ef hann væri búoinn að spila fleiri leiki en hann er búinn að spila nógu marga leiki til að vera klár í þetta verkefni, eins og þeir allir," sagði Guðmundur við Fótbolta.net í dag.
Guðmundur segist sjá mikinn mun á markvörðum íslenska landsliðsins eftir að þeir fóru út í atvinnumennsku.
,,Ég sé gríðarlegan mun á þeim, bæði tæknilega og líkamlega. Ég myndi vilja sjá fleiri markmenn fara þessa leið. Þú verður að taka þessa áskorun. Þú verður að setja smá pressu á sjálfan þig ef þú ætlar að vera betri. Þú ert í meiri samkeppni erlendis en heima, með fullri virðingu fyrir dagskránni þar,"
Hannes er á mála hjá Sandnes Ulf sem féll úr norsku 1. deildinni í fyrra. Guðmundur viðurkennir að hann vilji sjá Hannes fara í annað lið.
,,Ég vonast til að Hannes fari í betri deild. Ég held að það sé lykill fyrir hann að stíga það skref, allavegana á næsta ári. Ég hef trú á því að hann verði eftirsóttur. Sumarið er framundan og þá sjáum við hvað setur," sagði Guðmundur.
Hér að ofan má sjá viðtalið við Guðmund í heild en í myndbandinu tjáir hann sig einnig um markverði andstæðingana.
Athugasemdir
