Ceballos á 56 leiki að baki fyrir Real Madrid og 9 fyrir spænska landsliðið. Hann var lykilmaður í afar sigursælu U21 landsliði Spánar frá 2015 til 2019.
Arsenal hefur áhuga á spænska miðjumanninum Dani Ceballos sem gerði góða hluti á láni hjá félaginu á nýliðnu tímabili.
Ceballos er samningsbundinn Real Madrid en litlar líkur eru á því að hann spili fyrir Spánarmeistarana á næstu leiktíð vegna of lítils spiltíma.
Miðjumaðurinn krefst þess að spila 35 leiki til að vera áfram hjá Real en annars hefur Real Betis mikinn áhuga á honum auk Arsenal.
„Ég er búinn að ræða við Florentino Perez og Jose Sanchez, við munum ákveða framtíð mína eftir City-Madrid leikinn. Ég vill ekki spila minna en 35 leiki," sagði Ceballos.
Ceballos á 24 ára afmæli á föstudaginn, sama dag og Real Madrid heimsækir Manchester City í 16-liða úrslitum Meistaradeildarinnar. Hann spilaði 37 leiki fyrir Arsenal á nýliðnu tímabili, þar af 24 í ensku úrvalsdeildinni.
Ceballos er búinn að vinna sér inn sæti í byrjunarliði Arsenal undir stjórn Mikel Arteta. Hann byrjaði við hlið Granit Xhaka á miðjunni er liðið vann enska bikarinn í gær.
Athugasemdir
