Þrennan hjá Kane þýðir það að hann er kominn með 25 mörk í 40 landsleikjum en enskir miðlar spá því að hann eigi eftir að slá met Wayne Rooney sem skoraði 53 mörk í 120 landsleikjum áður en hann lagði landsliðsskóna á hilluna.

Kane er nánast kominn hálfa leið en hér fyrir neðan má sjá áhugaverða tölfræði yfir það hvað það tók stærstu stjörnunar marga leiki til að skora 25 mörk.

Thierry Henry, fyrrum framherji Arsenal og franska landsliðsins, þurfti 56 leiki, Robin van Persie 57 leiki og þá þurfti Zlatan Ibrahimovic 65 leiki með sænska landsliðinu.

Tveir allra bestu knattspyrnumenn heims eru svolítið á eftir en Lionel Messi þurfti 70 leiki á meðan Cristiano Ronaldo þurfti 79 leiki.