„Þetta var frábær fyrri hálfleikur. Við unnum alla bolta, skalla í vörninni og á miðjunni. Við hefðum kannski getað skorað fleiri mörk í fyrri hálfleik, við fengum færi en þetta var nóg. Við duttum kannski aðeins niður og beittum fleiri skyndisóknum í seinni hálfleik en þetta var eiginlega fullkominn leikur hjá okkur," sagði Gylfi Þór Sigurðsson í viðtal við Fótbolta.net eftir 2-0 sigur á Tyrkjum á heimavelli, í undankeppni fyrir HM.
Lestu um leikinn: Ísland 2 - 0 Tyrkland
Fyrirliði landsliðsins, Aron Einar Gunnarsson var í leikbanni í kvöld og tók Birkir Bjarnason stöðu hans á miðjunni.
„Birkir og Theodór Elmar stóðu sig vel. Það sýnir breiddina í hópnum að þeir leikmenn sem hafa verið fyrir utan og beðið eftir tækifærinu eru meira en nógu góðir til að koma inn í liðið."
„Tíminn í Frakklandi og reynslan og allt það er að haldast í hendur. Við höfum verið lengi saman síðustu fjögur, fimm ár. Mestmegnis sami hópur og kannski erfitt fyrir þjálfarana að breyta um lið. Við höfum verið að bæta okkur mikið en þegar við þurfum að breyta um byrjunarlið eins og í dag og gegn Finnlandi þá eru þeir leikmenn sem hafa verið að bíða, tilbúnir og staðið sig frábærlega," sagði Gylfi sem var ánægður með hvernig íslenska liðið mætti til leiks.
„Við slökktum á þeim í byrjun og við vissum að það væri erfitt fyrir þá að spila, eftir langt ferðalag og erfiðan leik á fimmtudaginn. Veðrið er allt öðruvísi en þeir eru vanir og við reyndum að nýta okkur það," sagði Gylfi.
Viðtalið í heild sinni má sjá í sjónvarpinu hér að ofan.
Athugasemdir
