Suarez og Ousmane Dembele eru báðir frá út tímabilið og þá ákvað Barcelona að leyfa Abel Ruiz og Carlos Perez að fara annað í janúar en Börsungar eru nú með leyfi til að fá inn framherja á neyðarláni.

Félagið hefur verið að horfa til Willian Jose hjá Real Sociedad og Rodrigo hjá Valencia en nú er kominn annar maður í spilið. Sá heitir Luis Suarez og er samningsbundinn Watford á Englandi.

Suarez er 22 ára gamall Kólumbíumaður en hann er á láni hjá Real Zaragoza frá Watford. Hann hefur gert 14 mörk í spænsku B-deildinni á þessari leiktíð og er Barcelona nú að skoða möguleikann að fá hann frá Watford.

Samkvæmt Cadena Sur hefur Watford ekki áhuga á að senda Suarez til Barcelona en framherjinn á enn eftir að spila fyrir aðallið enska félagsins.