Magnús Már Einarsson skrifar frá Brussel:
Heimir Hallgrímsson.
Ómar Smárason fjölmiðlafulltrúi.
„Það eru allir heilir eftir leikinn í gær," sagði Heimir Hallgrímsson landsliðsþjálfari við Fótbolta.net áðan. Viðtalið má sjá í heild sinni í sjónvarpinu hér að ofan.
„Það voru sumir leikmenn með smávægileg meiðsli sem hvíldu í gær. Við ættum að geta byrjað þennan stutta undirbúning fyrir Tékkaleikinn af krafti. Við reynum að hvíla okkur í dag og við ætlum út að borða í kvöld."
En hvert á að fara út að borða?
„Ef Ómar fjölmiðlafulltrúi fengi að ráða þá færum við á McDonalds en ég held að hann fái ekki að ráða. Ætli Gunni Gylfa ráði ekki og við förum á eitthvað steikhús sennilega," sagði Heimir kíminn.
Íslenska liðið fer ekki strax til Tékklands en taktísk atriði verða æfð í Belgíu.
„Við getum eytt tíma í rólegheitum hér og farið yfir föst leikatriði og annað sem þarf. Það geta verið njósnarar allstaðar. Vonandi verða ekki margir að fylgjast með okkur."
„Það má búast við öllu. Ég vona að þeir Tékkar sem mættu til að leikgreina okkur í gær séu með meiri hausverk en þeir voru með fyrir leikinn. Það eru margir sem gera tilkall til að byrja gegn Tékkum."
„Þetta eru áþekk lið með svipaða eiginleika. Leikurinn getur farið hvernig sem er en við þurfum að hugsa um að eiga góðan leik gegn þeim, sérstaklega varnarlega og þá er allt hægt. Við erum ekkert hræddir við Tékkana þó við vitum þeirra styrkleika."
„Það er gaman að leikgreina þetta lið. Það eru skemmtilegar hlaupaleiðir og afskaplega góður leikskilningur milli leikmanna. Þetta er mjög vinnusamt lið og margt sem þarf að varast."
Viðtalið má sjá í heild sinni í sjónvarpinu hér að ofan.
Athugasemdir
