Lestu um leikinn: ÍA 3 -  1 Afturelding

ÍA tók á móti Aftureldingu í botnslag Bestu deildarinnar. Liðin áttust við í síðustu umferð fyrir tvískiptingu deildarinnar.

Gestirnir úr Mosfellsbæ byrjuðu betur og komust nálægt því að skora á upphafsmínútunum, ef ekki fyrir glæsilegar markvörslur Árna Marinós Einarssonar.

Afturelding var sterkari aðilinn stærsta hluta fyrri hálfleiks en Skagamenn byrjuðu að láta til sín taka á 30. mínútu. Þeir klúðruðu nokkrum frábærum færum áður en Ómar Björn Stefánsson kom boltanum í netið eftir hornspyrnu á 39. mínútu.

Mosfellingar reyndu að svara fyrir sig en tilraunir þeirra báru ekki árangur. Þess í stað tvöfaldaði Viktor Jónsson forystu heimamanna í upphafi síðari hálfleiks, með skalla eftir aukaspyrnu langt utan af velli.

Gestirnir áttu skot í slá og skiptust liðin á að eiga færi og vilja fá dæmdar vítaspyrnur þar til á lokamínútunum, þegar Luc-Martin Kassi minnkaði muninn af stuttu færi til að gera leik úr þessu. Staðan orðin 2-1.

Von Mosfellinga lifði þó ekki lengi því Ómar Björn slökkti endanlega á gestunum með marki einni mínútu síðar. Lokatölur 3-1.

Skagamenn lyfta sér af botni deildarinnar með þessum sigri en þetta er annar sigur liðsins í röð. Þeir eiga 22 stig eftir 22 umferðir, einu stigi meira heldur en Afturelding sem hefur tapað síðustu þremur leikjum sínum.