Hörður Björgvin á æfingunni í dag.
Varnarmaðurinn Hörður Björgvin Magnússon var ekki til í að svara á ítölsku í viðtali við Fótbolta.net í dag en sagði að það væri gott að vera mættur aftur til Parma.
Eins og fleiri í íslenska landsliðinu hefur Hörður ekki fengið margar mínútur síðustu vikur með félagsliði sínu. Hörður hefur verið ónotaður varamaður í síðustu leikjum með Bristol City í Championship-deildinni.
„Tímabilið byrjaði vel hjá mér og ég spilaði yfir 20 leiki í röð. Svo fór liðinu að ganga illa og þjálfarinn fór að reyna að finna út hvar væru veikleikar og hvað við þyrftum að gera. Við erum nokkrir sem vorum teknir út án þess að gefin væru rök fyrir því," segir Hörður.
„Ég fékk tækifærið aftur og nýtti það vel. Ef maður er ekki í byrjunarliðinu verður maður að vera klár á bekknum."
Þegar Hörður fékk tækifærið í upphafi mánaðarins lék hann virkilega vel í leik gegn Burton Albion. Hann var valinn í úrvalslið umferðarinnar í Championship-deildinni en þrátt fyrir það hefur hann ekki spilað mínútu síðan.
„Ég er mjög svekktur yfir því og veit að það eru margir stuðningsmenn líka. Liðið hefur komist aðeins ofar í deildinni og er ánægður með það, ég er ánægður ef við höldum okkur uppi. Maður vill samt spila sem flesta leiki," segir Hörður sem segist þó ekki vera farinn að hugsa sér til hreyfings frá Bristol.
„Maður veit samt ekkert hvað gerist í þessum fótbolta."
Viðtalið má sjá í heild sinni í sjónvarpinu hér að ofan.
Fótbolti.net er með öflugt teymi í Hollandi og er hægt að fylgjast með öllu bak við tjöldin á Snapchat (Fotboltinet), á Instagram og öðrum samskiptamiðlum okkar.
Leikir Íslands á EM:
Ísland 0-1 Frakkland
Ísland 1-2 Sviss
Ísland 0-3 Austurríki
Athugasemdir
