Haukur Harðar spáir í leiki helgarinnar á Englandi

---

Newcastle 1 - 3 Chelsea (12:30 í dag)
Mínir menn eru farnir að slípast vel saman og Lampard virðist loksins vita um það bil sterkasta byrjunarliðið sitt. Hakim Ziyech er listamaður og var síðasta púslið sem vantaði og Chelsea sækir frekar þægilegan sigur á St. James‘ Park. Ekki afskrifa Chelsea í titilbaráttunni.

Aston Villa 2 - 0 Brighton (15:00 í dag)
Villa-menn spila skemmtilegan og árangursríkan bolta og vinna auðveldan sigur á Brighton sem verður áfram í brasi.

Tottenham 2 - 1 Manchester City (17:30 í dag)
Þetta verður hrikalega áhugaverður leikur. Það eru einhverjir Mourinho töfrar í gangi hjá Tottenham og City hefur gengið frekar illa að skora á leiktíðinni. Tottenham vinnur „statement“ sigur og önnur lið þurfa að fara að vara sig.

Manchester United 4 - 0 WBA (20:00 í kvöld)
Solskjaer er rosa duglegur að kaupa sér tíma þegar hann þarf mest á því að halda. Það gerist aftur hér og United vinnur þægilegan sigur á liði West Brom sem hefur ekki enn unnið leik. Rashford skorar tvö og allir kátir á Old Trafford í þetta skiptið.

Fulham 0 - 1 Everton (12:00 á morgun)
Everton hefur tapað þremur í röð en þeirri taphrinu lýkur á Craven Cottage. Calvert-Lewin skorar markið en Gylfi kemur inn á eftir 60 mínútur og hjálpar til við að sigla sigrinum í höfn.

Sheffield United 0 - 1 West Ham (14:00 á morgun)
Sheffield er með eitt stig á botninum en þeir hafa tapað mörgum leikjum ansi naumlega. Því miður fyrir þá gerist það í enn eitt skiptið.

Leeds 2 - 1 Arsenal (16:30 á morgun)
Tímabilið hefur verið mikill rússíbani fyrir Leedsara hingað til en þeir fara brosandi inn í næstu viku eftir flottan sigur á Arsenal. Einhverjir stuðningsmenn Arsenal munu halda „Fraudeta“ herferðinni áfram eftir leik.

Liverpool 1 - 0 Leicester (19:15 á morgun)
Toppslagur á Anfield en því miður fyrir heimamenn vantar um það bil 26 leikmenn í hópinn. Ótrúlegur meiðslalisti hjá Liverpool en Klopp nær að þjappa mannskapnum saman og kreista fram 1-0 sigur. Ef Liverpool vinnur titilinn aftur horfa menn á þennan leik sem vendipunkt tímabilsins.

Burnley 1 - 3 Crystal Palace (17:30 á mánudag)
Það hefur verið mjög gaman að horfa á leiki með Palace á tímabilinu og ég held að þeir vinni frekar þægilegan leik á slöku Burnley liði. Zaha setur allavega eitt í 3-1 sigri.

Wolves 2 - 2 Southampton (20:00 á mánudag)
Eina jafnteflið í umferðinni en jafnframt einn skemmtilegasti leikurinn. Ótrúlegt hvað Ralph Hasenhüttl hefur náð að búa til vel spilandi lið með Southampton. Wolves jafnar seint í leiknum með skallamarki frá Raul Jimenez.

Fyrri spámenn
Sóli Hólm - 6 réttir
Gummi Ben - 5 réttir
Logi Bergmann Eiðsson - 5 réttir
Sara Björk Gunnarsdóttir - 5 réttir
Sölvi Tryggvason - 5 réttir
Þorlákur Árnason - 4 réttir
Birkir Már Sævarsson - 3 réttir
Steindi Jr. - 3 réttir