Hólmar Örn Eyjólfsson var í hjarta varnarinnar hjá Val sem gerðir 3-3 jafntefli við KR í Bestu deildinni í kvöld.
Lestu um leikinn: KR 3 - 3 Valur
Heimamenn í KR tóku forystuna þrisvar en alltaf tókst Völsurum að jafna.
„Sem varnarmaður fannst mér við full opnir á köflum, ég hefði viljað sjá okkur taka meiri stjórn á leiknum. Þetta var endanna á milli sem hleypir leikjum oft upp í vitleysu og þá getur allt gerst. Það hefur örugglega verið skemmtilegt að horfa á leikinn," sagði Hólmar Örn sem var sáttur með stigið miðað við hvernig leikurinn spilaðist.
Þetta var fyrsti leikur Ólafs Jóhannessonar við stjórnvölinn hjá Val en hann tók við af Heimi Guðjónssyni í síðustu viku. Heimir var látinn fara eftir 3-2 tap gegn ÍBV í síðustu umferð.
„Það er ekki hægt að benda á einn mann og segja að gengið hafi verið slæmt útaf honum. Þó það sé ekki vesenið þá er það oft þannig þegar maður skiptir um þjálfara að þá kemur eitthvað extra búst í menn og óvissa um byrjunarliðssæti sem kemur mönnum upp á tærnar. Við munum sjá hvernig það gengur hjá okkur."
Valur er í 5. sæti Bestu deildarinnar með 21 stig eftir 14 umferðir.
