„Þetta var erfiður leikur á móti Þjóðverjum. Þeir eru erfiðir að eiga við. Við fengum tvö mörk á okkur snemma og þetta var bratt eftir það," sagði Jón Daði Böðvarsson, framherji Íslands, við Fótbolta.net eftir 3-0 tapið gegn Þýskalandi í undankeppni HM í gær.

„Síðari hálfleikur var miklu betri að mínu manni. Það var skýrara hvað við áttum að gera. Við vöknuðum, fórum að pressa meira og það gekk ágætlega upp. Maður veit aldrei hvernig þetta hefði farið ef við hefðum náð kannski að fara með 0-0 í hálfleik."

Jón Daði var einn frammi hjá ísenska liðinu í gær. „Þetta var erfitt. Þetta var mikið af hlaupum og maður var lítið í boltanum, eðlilega kannski. Maður er svolítið lemstraður í dag en verður klár í næsta leik."

Næsti leikur Íslands er strax á sunnudaginn gegn Armeníu. „Næsti leikur er strax, það er engin pása. Við erum með gott teymi til að gera mann kláran fyrir þann leik," segir Jón Daði en han er klár í að spila þrjá leiki á einni viku. „Já, já, ég er í Championship og það er nóg af leikjum þar."

Hér að ofan má sjá viðtalið í heild.