ÍH er búið að tryggja sér sæti í 3. deildinni á næsta ári eftir stórsigur gegn Kormáki/Hvöt í úrslitaleik um síðasta lausa sætið.

Liðin skildu jöfn 1-1 í fyrri leiknum en í dag áttu Hafnfirðingar heimaleik og létu heldur betur finna fyrir sér.

Andri Þór Sólbergsson, Pétur Hrafn Friðriksson og Bergþór Snær Gunnarsson skoruðu allir tvennur í stórsigri heimamanna.

ÍH er því farið upp ásamt KFS, sem sigraði Hamar fyrr í dag.

Liðin voru saman í ansi jöfnum A-riðli í sumar. KFS vann riðilinn og endaði ÍH í öðru sæti, með 29 stig eftir 14 umferðir.

Það mátti litlu muna að ÍH kæmist ekki í úrslitakeppnina þar sem liðið endaði aðeins einu stigi fyrir ofan Ými eftir gríðarlega spennandi lokahnykk á riðlakeppninni.