Championship: Sunderland gekk frá Millwall í seinni hálfleik

Sunderland vann góðan 3-0 sigur á Millwall í ensku B-deildinni í dag en þetta var fyrsti leikur deildarinnar síðan um miðjan nóvember.

Zian Flemming, leikmaður Millwall, fékk gullið tækifæri til að koma Millwall yfir í fyrri hálfleiknum en klúðraði og var því markalaust í hálfleik.

Hálfleiksræða Tony Mowbray, stjóra Sunderland, virkaði greinilega vel því Amad Diallo kom liðinu yfir á 53. mínútu eftir sendingu frá Ellis Simms áður en Alex Pritchard þrumaði boltanum í netið fimm mínútum síðar eftir góðan undirbúning frá Lynden Gooch.

Millwall reyndi eins og það gat að komast aftur í leikinn en Simms gerði út um vonir þeirra með marki í uppbótartíma. Hann fékk langa sendingu inn fyrir og lyfti boltanum yfir markvörð Millwall og í netið.

Sunderland er í 10. sæti með 30 stig en Millwall með 31 stig í 7. sæti.