„Mér fannst þetta frekar þægilegt, en við hefðum getað skorað fleiri mörk," sagði Matthías Guðmundsson, aðstoðarþjálfari Vals, eftir 3-0 sigur gegn Þór/KA í Bestu deild kvenna í kvöld.
Lestu um leikinn: Valur 3 - 0 Þór/KA
Valur kom sér í ansi góða stöðu með því að skora tvisvar á fyrstu tíu mínútum leiksins.
„Það hjálpaði mikið. Við gerðum mjög vel í byrjun leiks, en ég hefði kannski viljað fá fleiri mörk."
Valur tapaði 2-1 fyrir Þór/KA í fyrri leik liðanna á þessu tímabili. Hvað var öðruvísi núna? „Þetta var bara svipað en í þetta sinn ná þær ekki boltanum inn. Við fengum fullt af færum í þeim leik, en í dag nýttum við færin - allavega einhver þeirra."
Landsliðskonan Elín Metta Jensen var ekki í hóp í síðasta leik og kom inn af bekknum í dag.
„Elín var með flensu og þurfti tíma að ná sér. Hún kom mjög vel inn í dag," sagði Matthías.
Matthías er sjálfur á fyrsta ári sem aðstoðarþjálfari kvennaliðs Vals. „Þetta hefur verið frábært, hrikalega skemmtilegt. Þetta er flottur hópur og mjög 'professional' hópur. Ég er að læra á fullu og hef mjög gaman að þessu."
Allt viðtalið er í spilaranum hér að ofan.
Athugasemdir