Róbert Frosti Þorkelsson var hetja Stjörnumanna þegar þeir unnu dramatískan sigur á Þór í átta liða úrslitum Mjólkurbikarsins á Akureyri í kvöld. Fótbolti.net ræddi við hann eftir leikinn.
Lestu um leikinn: Þór 0 - 1 Stjarnan
„Það var gott að klára þetta. Þetta var erfiður leikur, erfitt gras. Andstæðingurinn var góður, þéttir og skipulagðir. Það var geðveikt að ná að klára þetta svona," sagði Róbert Frosti.
Liðinu tókst varla að brjóta sterkan varnarmúr Þórs í kvöld.
„Við ætluðum að fara í fleiri fyrirgjafir. Svo ætluðum við í löngu boltana en það gekk ekkert rosalega vel en það er allt í lagi," sagði Róbert Frosti.
Róbert skoraði sigurmarkið á lokasekúndum leiksins.
„Þetta var kannski ekki fallegasta markið en mark skiptir máli. Örvar Eggerts kom með mjög lélega fyrirgjöf og markmaðurinn missir boltann frá sér og ég stend þarna einn og pota honum inn. Ég hélt ég hefði klúðrað færinu, hjartað mitt stoppaði en hann söng inni, það er það sem skiptir máli," sagði Róbert Frosti.