„Þessi var virkilega sætur í dag," sagði Björn Daníel Sverrisson leikmaður FH eftir 2 - 3 útisigur á Keflavík í Bestu-deild karla í dag en þarna vann FH sinn annan leik í röð í fallbaráttunni.
Lestu um leikinn: Keflavík 2 - 3 FH
„Það eru erfiðar aðstæður og maður vissi að annað liðið myndi í sitthvorum hálfleiknum pressa hitt liðið stíft. Við vorum marki undir eftir fyrri hálfleikinn og sáum möguleika á að geta pressað á þá í seinni hálfleiknum. Við náðum að skora tvö og hefðum geta skorað 3 eða 4 í viðbót fannst mér. Það er alltaf sætt að vinna með einu marki."
Keflavík komst í 2 - 0 en FH minnkaði muninn rétt fyrir hálfleik.
„Það var virkilega mikilvægt. Þeir hefðu geta þétt raðirnar meira í 2 - 0 yfir og það er líka erfiðara að vera 2-0 undir í hálfleik og sjá fyrir sér að þurfa að skora þrjú. Þetta eina mark sem við gerðum í lok fyrri hálfleiks var sætt og gaf okkur vonina þegar við fórum inn í seinni hálfleikinn. Við vissum alltaf að við myndum skora meira en þurftum að brjóta ísinn og það var ljúft að vinna tvo leiki í röð."
FH er nú komið í þá stöðu að geta tryggt áframhaldandi veru í deildinni með sigri á Fram í næstu umferð.
„Þetta hefur verið erfitt tímabil og kannski er þetta rétti tímapunkturinn að snúa þessu við. Maður hefði samt viljað vera ofar í töflunni en svona er fótboltinn. Við förum í næsta leik á sunnudaginn og ætlum að vinna hann og þá getur maður andað aðeins léttar í lokaumferðinni og notið þess án þess að vera með allan heiminn á herðum sér."
