„Mér fannst þetta skemmtilegur leikur. Þetta var baráttuleikur. Þær mættu okkur af mikilli hörku og við þurftum að hafa vel fyrir þessu í dag,“ sagði Elísa Viðarsdóttir, leikmaður Vals, eftir 2-1 sigur á Þrótti í kvöld.
Lestu um leikinn: Þróttur R. 1 - 2 Valur
Valsarar byrjuðu leikinn af krafti en Þrótturum tókst að bíta frá sér og úr varð hörkuleikur.
„Þróttarnir fóru að mæta okkur vel inná miðjunni og voru að vinna seinni boltann. Við vorum kannski frekar svona sloppy og ekki á okkar besta degi í fyrri hálfleik,“ sagði Elísa en þvertók fyrir að Íslandsmeistararnir hefðu vanmetið nýliðana.
„Nei, alls ekki. Við erum búnar að undirbúa okkur ótrúlega vel alla vikuna og fara yfir Þróttarana. Þær eru bara með hörkulið. Þær eru með frábæra útlendinga og ótrúlega þéttar og sterkar svo ég held það verði ekkert grín að mæta hér á Eimskipsvöllinn.“
„Ég held að allir leikirnir í sumar verði hörkukrefjandi og við þurfum að mæta tilbúnar í alla leiki. Það vilja auðvitað allir vinna Íslandsmeistarana,“ sagði Elísa meðal annars en hægt er að horfa á allt viðtalið við hana í spilaranum hér að ofan.
Athugasemdir
