„Ég man ekki eftir öðru eins. Þessu var bara stolið frá okkur og maður veit ekki hvernig á að bregðast við því og glíma við það.“ sagði Jón Þór Hauksson, þjálfari Skagamanna eftir grátlegt 4-3 tap gegn Víkingum í dag.
Lestu um leikinn: ÍA 3 - 4 Víkingur R.
Jón Þór var alls ekki sáttur með dómgæsluna í dag og segir að sigrinum hafi verið stolinn af þeim.
„Það er ömurlegt. Ömurlegt á allan hátt. Þetta er eins ósanngjarnt og verið getur. Mér fannst bara frá upphafi til enda dómgæslan vera ömurleg í þessum leik. Á upphafsmínútunum á Hinrik að fá vítaspyrnu en fær gult spjald að launum. Svo lítur maður á fjórða dómarann og það er Erlendur Eiríksson sem að eyðilagði fyrri leikinn á móti Víking fyrir okkur. Maður hugsar bara er þetta grín, er verið að ögra okkur? Er verið að gera grín að okkur?“
„Þetta er náttúrulega bara dómgreindarleysi af hæstu sort að senda hann svo hingað sem fjórða dómara. Hann hefði getað verið fjórði dómari á öllum öðrum leikjum í sumar, í þessari umferð en bara ekki í þessum leik. Þetta er ótrúlegt. Ótrúleg ákvörðun. En ekki það að Elli (Erlendur Eiríksson) hafi gert eitthvað af sér eða haft áhrif á úrslit leiksins en þetta er bara svo mikið dómgreindarleysi. Fyrsta atvikið þegar Hinrik á að fá víti snýr maður sér við og sér Erlend Eiríkson, í alvöru talað. Ótrúlegt.“
Hefur Jón Þór fundið ástæðuna afhverju markið var tekið af Skagamönnum sem þeir skoruðu í blálokin en var dæmt af?
„Það er búið að skoða þetta milljón sinnum hérna en það finnur enginn brot neinstaðar. Hann gaf þá skýringu að hann hafi dæmt hendi. Það getur enginn séð það, hvorki á Spiideo eða sjónvarpsútsendingum eða neinum vélum sem eru hérna á vellinum. Þetta er bara hlægilegt, ömurleg dómgæsla. Þessu var bara stolið af okkur í dag. Það er ekki hægt að segja neitt annað um það.“
ÍA á ekki séns að ná Evrópu sæti eftir þessi úrslit, eru það vonbrigði úr því sem komið var?
„Auðvitað eru það vonbrigði að ná ekki að keyra það fram í síðasta leik. En ef maður lítur á tímabilið í heild sinni höfum við spilað virkilega vel og gert vel sem nýlliðar. Við höfum tekið dýfur en karakterinn og krafturinn í hópnum er þannig að dýfurnar hafa ekki verið djúpar eða stórar. Það væri mjög einkennileg greining á þessu tímabili að það væri vonbrigði fyrir ÍA að ná ekki Evrópu.“ sagði Jón Þór Hauksson, þjálfari Skagaliðsins.
Nánar er rætt við Jón í spilaranum hér að ofan.
