Natasha Anasi.
Natasha fyrir leik Íslands og Þýskalands í fyrra. Hún átti frábæran leik þar í mögnuðum 3-0 sigri Íslands.
Natasha er á mála hjá Val.
„Þetta er ótrúlegt. Ég er mjög spennt. Við erum að undirbúa okkur mjög vel hérna. Þetta er bara draumur," segir Natasha Anasi sem er á leið á Evrópumótið með Íslandi.
Íslenska landsliðið er núna statt í Stara Pazova í Serbíu þar sem það er í æfingabúðum fyrir EM sem fer fram í Sviss. Fyrsti leikur á EM er gegn Finnlandi næsta miðvikudag.
Íslenska landsliðið er núna statt í Stara Pazova í Serbíu þar sem það er í æfingabúðum fyrir EM sem fer fram í Sviss. Fyrsti leikur á EM er gegn Finnlandi næsta miðvikudag.
Natasha fékk íslenskan ríkisborgararétt árið 2019 eftir að hún spilaði fótbolta á Íslandi í fimm ár. Hún fæddist í Texas í Bandaríkjunum og var í Duke háskólanum, sem er mjög virtur íþróttaháskóli. Eftir háskólagönguna fór hún í ÍBV og var þar í þrjú tímabil. Svo lék hún með Keflvíkingum við frábæran orðstír frá 2017 til 2021 og Breiðabliki sumarið 2022. Hún fór til Noregs og samdi við Brann eftir það en sneri heim í fyrra og gekk í raðir Vals.
Eftir að hafa fengið íslenskan ríkisborgararétt 2019 þá spilaði hún fyrsta landsleikinn með Íslandi gegn Norður-Írlandi árið 2020. Núna eru landsleikirnir orðnir níu talsins og er hún núna á leið á stórmót.
„Þetta var ótrúleg tilfinning," segir Natasha um hvernig það var þegar hún fékk að vita að hún væri í hópnum. „Ég var búin að vinna í þessu ótrúlega lengi og vonast eftir því að þetta myndi gerast. Svo gerist þetta bara. Ég er spennt að spila á stórmóti."
Natasha viðurkennir að þetta hafi verið ákveðinn draumur eftir að hún fékk íslenskan ríkisborgararétt og það hafi verið geggjað þegar hún fékk að vita að hún væri að fara með á mótið.
„Ég vildi þetta þegar ég komst að því að ég myndi spila með íslenska landsliðinu. En þegar ég fékk ríkisborgarétt þá var ég fyrst og fremst að gera það fyrir fjölskylduna mína og gera lífið mitt auðveldara þar sem ég bý á Íslandi. Svo kom kallið að spila fyrir íslenska landsliðið og það var geggjað. Þegar þú ert búin að komast aðeins inn í þetta þá er draumurinn að spila á stórmóti," segir Natasha.
„Það er mikið stolt sem fylgir því að spila fyrir Ísland. Þú finnur það hvernig fólk fylgir liðinu og styður við mann. Þú getur ekki annað en heyrt hjartað slá þegar þú heyrir íslenska þjóðsönginn."
Æfa í miklum hita í Serbíu
Síðustu daga hefur Ísland verið að undirbúa sig fyrir mótið í miklum hita í Serbíu og svo er leikur á morgun gegn heimakonum. Það er síðasti leikurinn fyrir mótið.
„Það er ótrúlega heitt en við höfum undirbúið okkur vel. Fyrstu tveir dagarnir eru búir að vera mjög góðir. Það er geggjað æfingasvæðið og allt í kringum þetta mjög flott. Það er næs að vera hérna," segir Natasha.
Markmiðið hjá íslenska liðinu er alveg skýrt og það er að fara upp úr riðlinum á EM.
„Auðvitað er það markmiðið okkar," segir Natasha en í viðtalinu hér að ofan ræðir hún til dæmis líka um Val. Hún er lykilkona þar en það hefur ekki gengið nægilega vel hjá Valskonum í Bestu deildinni í sumar.
Allt viðtalið má sjá í spilaranum hér fyrir ofan.
Leikir Íslands á EM:
2. júlí, Ísland - Finnland
6. júlí, Ísland - Sviss
10. júlí, Ísland - Noregur
