Emil Ásmundsson, miðjumaður Fylkis, hefur komið sterkur inn í liðið á þessu tímabili eftir erfið meiðsl síðustu ár. Honum var létt eftir að uppeldisfélag hans vann 4-0 sigur á Þrótti Vogum og gulltryggði þar með Lengjudeildartitil þeirra.
„Þetta er búið að vera mikill léttir fyrir mig persónulega að geta komist aftur inn á völlinn og spila fótboltaleiki í hverri viku. Maður var svona hálfpartinn búinn að afskrifa þetta."
Lestu um leikinn: Fylkir 4 - 0 Þróttur V.
Emil sagði að það myndi skýrast á næstu dögum hvort hann verði áfram í Árbænum.
„Ég held það sé mjög líklegt."
Emil telur að það sé þörf á liðstyrk, en horfir einnig í yngri flokkana þegar kemur að nýjum leikmönnum inn í meistaraflokk félagsins.
„Auðvitað er alltaf þörf á einhverri styrkingu en við erum líka bara að reyna að horfa í innviðina hjá okkur. Yngri flokkarnir þeir þurfa að stíga upp, það er búið að einkenna Fylki síðustu ár er að það eru ungir leikmenn að koma upp og fá hlutverk."
