Bestir í 2. deild: Tveir Grenvíkingar

Leikmaður 18. umferðar í 2. deild karla að mati Ástríðunnar var Guðni Sigþórsson, leikmaður Magna frá Grenivík.

„Hann skoraði þrennu á móti Reyni Sandgerði og pakkaði þeim saman. Hann er búinn að koma virkilega vel inn í þetta hjá Magna eftir að hann skipti yfir í glugganum," sagði Sverrir Mar Smárason.

„Ég er peppaður fyrir Magna í síðustu fjórum leikjunum. Þeir gætu komið bakdyra megin í alvöru toppbaráttu," sagði Óskar Smári.

Leikmaður 19. umferðar í 2. deild karla að mati Ástríðunnar var Frosti Brynjólfsson, leikmaður Hauka en hann er uppalinn í Magna.

„Þrátt fyrir að umræðan snérist um slæman rekstur félagsins þá breytir það ekki þeirri staðreynd að þeir svöruðu vel fyrir ömurlegt gengi liðsins. Þeir tóku Fjarðabyggð sem voru búnir að vinna tvo leiki í röð og pökkuðu þeim saman 6-1 og Frosti var þar manna bestur," sagði Gylfi Tryggvason.

„Gerir þarna öfluga þrennu og fer fyrir liðinu í markaskorun og fleiru. Það væri gaman að sjá smá vakningu hjá Haukum í lokin, að mínu mati eru það Frosti og Tómas Leó sem munu leiða það." Sagði Sverrir Mar.