Úrslitakeppni til að klára tímabilið á Ítalíu? - Rætt um að fresta EM um eitt ár

Sett hefur verið bann á íþróttaviðburði á Ítalíu til 3. apríl og nú er verið að funda um hvernig eigi að klára tímabilið í ítölsku A-deildinni. Reynt verður að ljúka tímabilinu fyrir 31. maí.

Ljóst er að ekki verður tími til að klára alla frestuðu leikina innan þess tímaramma, svo ekki sé talað um bikarkeppnina.

Það eru nokkrir möguleikar sem verið er að ræða:

- Ekkert lið verður Ítalíumeistari en ítalska knattspyrnusambandið tilkynnir um lið sem taka þátt í Evrópukeppnum,

- Farið verður eftir töflunni eins og hún var þegar tímabilið var truflað.

- Skipuleggja sérstaka úrslitakeppni um Ítalíumeistaratitilinn og aðra úrslitakeppni til að ákveða hvaða lið falla í B-deildina.

Eftir 26 umferðir er Juventus með 63 stig á toppnum, Lazio er með 62 og Inter með 54 stig auk þess að eiga leik til góða.