Einhver bið hefur verið eftir því að Miranda fengi leikheimild með Selfossi en sú bið tók enda í dag.

Miranda er 25 ára sóknarmaður og gæti hún spilað með Selfossi gegn Þór/KA í fjórðu umferð Bestu deildarinnar á morgun.

„Miranda er mjög alhliða sóknarmaður sem spilaði síðasta tímabil hjá mér í Kristianstad. Ég veit að hverju ég geng með því að fá hana hingað. Hún er mjög skemmtileg týpa, bæði á vellinum og fyrir utan hann. Hún er með góða tækni, róleg á boltanum og með gott skot í báðum fótum. Ég er alveg viss um að hún á eftir að koma að einhverjum mörkum og gefa okkur aukna breidd og aukin gæði í sóknarleik okkar," sagði Björn þegar Miranda var tilkynnt í febrúar.