„Við erum að spila á heimavelli og eigum að vinna alla leiki hérna. Ég er mjög vonsvikinn með það að við skulum ekki hafa unnið í dag," sagði Gregg Ryder eftir jafnteflið gegn Haukum í kvöld.
„Það var ekki eitthvað eitt sem við gerðum vitlaust, það var eiginlega allt. Þeir voru hungraðari, héldu boltanum betur og sýndu meiri vilja. Það var fullkomlega verðskuldað að þeir væru yfir í hálfleik og það ætti augljóslega ekki að gerast hér, það er stór spurning hvers vegna það gerist."
Í seinni hálfleik slökuðu Haukar á og Þórsarar gengu á lagið, en gerðu ekki nóg til að sigra. Toppbaráttan er spennandi en Fjölnir og Grótta gerðu sömuleiðis jafntefli í kvöld í toppslag.
„Ef þú lítur á leikina sem eru eftir þá eiga bæði þessi lið auðveldara prógramm eftir, og hafa spilað við öll liðin í efri hlutanum. Þau hafa gert mjög vel til að halda sér í baráttunni og maður myndi ætla að þessi tvö lið séu líklegust til að fara upp eins og staðan er. Kannski verður þetta á milli okkar og Fjölnis."
„Þegar upp er staðið verður maður bara að horfa á það sem maður er að gera sjálfur og hugsa fyrst og fremst um að skila sínu, við gerðum það ekki í dag og það eru vonbrigði."
Athugasemdir