Heimild: Morgunblaðið
Kári hefur leikið 86 landsleiki fyrir Ísland.
„Eins og staðan er núna þá hef ég meiri áhuga á yfirsýn og stefnumótun á breiðari grundvelli og það má alveg koma fram hér að ég hef augastað á starfi yfirmanns knattspyrnumála hjá KSÍ," segir Kári Árnason þegar hann er spurður að því hvort hugur hans leiti í þjálfun.
Kári er í ítarlegu viðtali við Sunnudagsblað Morgunblaðsins.
Kári er í ítarlegu viðtali við Sunnudagsblað Morgunblaðsins.
„Ég hef séð og lært margt á löngum ferli í atvinnumennsku og verið partur af bæði versta og langbesta landsliði Íslandssögunnar og hef því þann samanburð. Ég brenn fyrir knattspyrnunni í landinu og tel mig hafa margt fram að færa; ekki bara fyrir einstaka klúbba heldur þegar kemur að mótun heildarstefnu til framtíðar."
Kári segir að innan KSÍ sé fólk meðvitað um áhuga hans á starfi yfirmanns fótboltamála. Arnar Þór Viðarsson hefur verið í starfinu og stýrir því núna áfram til bráðabirgða. Eftir að Arnar tók við A-landsliðinu er þó ljóst að nýr aðili verður ráðinn í stöðuna síðar á þessu ári.
Kári er 38 ára og er enn að með Víkingi Reykjavík. Landsliðsskórnir eru ekki farnir formlega á hilluna þó hann hefur talað um að hann telji ólíklegt að kraftar hans verði nýttir áfram á þeim vettvangi.
„Ef landsliðsferli mínum er lokið þá er honum bara lokið og ég mun alls ekki móðgast þótt ég verði ekki valinn. Á móti kemur að lítið hefur breyst hjá mér á þessum þremur mánuðum. Ég er í svipuðu standi núna og í nóvember þegar ástæða þótti til að velja mig," segir Kári við Sunnudagsblað Morgunblaðsins.
Athugasemdir
