Alexis Sanchez, leikmaður Manchester United, birti færslu á samfélagsmiðlum eftir lokaumferð ensku úrvalsdeildarinnar í dag. Þar biðst hann afsökunar og kennir meiðslum um slaka frammistöðu sína á þessu tímabili.
Sanchez hefur verið arfaslakur frá því hann kom til United frá Arsenal í janúar 2017. Hann var hreint út sagt hörmulegur á tímabilinu sem var að ljúka.
Sanchez tók ekki þátt í 2-0 tapi Manchester United gegn Cardiff í dag. En eftir leikinn fór hann á Instagram og skrifaði þar afsökunarbeiðni. Í færslunni kennir hann meiðslum um slaka frammistöðu sína á tímabilinu.
„Þetta var mjög erfitt tímabil. Stuðningsmennirnir eiga skilið afsökunarbeiðni vegna þess að þeir styðja við bakið á þér sama hvað."
„Persónulega þá spilaði ég ekki eins vel og ég bjóst við vegna ófyrirsjáanlegra meiðsla."
„Fjölmiðlar og annað fólk voru með sögur um ýmislegt sem var ekki satt. Ég var alltaf fagmannlegur á öllum sviðum."
„Ég bið stuðningsmenn afsökunar að við skyldum ekki ná markmiðum okkar. Ég er viss um að Manchester United mun snúa aftur á þann stað sem það var á undir stjórn Sir Alex Ferguson á sínum tíma."
Færslu Sanchez má lesa í heild sinni hér að neðan.
Sanchez er samningsbundinn Manchester United til 2022. Hann er á risasamningi hjá félaginu.
