Berglind Björg Þorvaldsdóttir, leikmaður Breiðabliks, er spennt fyrir leik liðsins gegn Paris Saint-Germain í 16-liða úrslitum Meistaradeildar Evrópu í kvöld.

Breiðablik mætir PSG á Kópavogsvelli klukkan 18:30 en PSG er annað stærsta liðið í Frakklandi.

Berglind er markahæst í Meistaradeildinni til þessa en hún er með 9 mörk ásamt tveimur öðrum leikmönnum.

„Þetta er ástæðan fyrir að maður er í fótbolta. Maður vill spila eins mikið og maður getur og hvað þá svona stóra leiki. Þetta er geggjað," sagði Berglind við Fótbolta.net.

„Ég er búin að bíða spennt eftir þessum leik og allt liðið. Við verðum tilbúnar.. Við ætlum að gera okkar besta og förum í leikinn til þess að vinna, það er markmiðið."

„Þær eru með frábæra leikmenn en við mætum vel undirbúnar og lokum á hættulegustu póstana hjá þeim. Við tókum fund í gær og annar fundur á eftir, þær eru mjög góðar."

Berglind býst við góðri mætingu á leikinn en mikil umfjöllun hefur verið um þennan stórslag.

„Ég býst fastlega við því og mikið af fólki að tala um leikinn og fjalla um hann þannig ég býst við að stúkan verði full," sagði hún ennfremur en viðtalið má sjá í heild sinni hér fyrir ofan.

Tweet

Senda a Facebook Hafdu samband Senda frétt Prenta frétt Frétta leit