Ancelotti hefur gert Everton ítalskara

„Liðið er að verða betra, massívara og ítalskara. Það er ekki geggjað að horfa á þá alltaf en þeir eru compact eins og Rafa Benítez talaði um. Það valtar enginn yfir þá. Hann hefur keypt leikmenn sem hefur vantað inn í þetta," sagði Viðar Guðjónsson, stuðningsmaður Everton, í hlaðvarpsþættinum „Enski boltinn" í dag.

„Þeir eru þremur stigum á eftir Liverpool og eiga tvo leiki inni. Þeirra stefna hlýtur að vera fyrir ofan Liverpool í ár," sagði Jón Júlíus Karlsson í þættinum í dag.

Viðar segir töp á heimavelli gegn Newcastle og Fulham að undanförnu hafa verið svekkjandi en hann er bjartsýnn á að Everton geti barist um sæti í topp fjórum og reynt að gera atlögu að því að komast í Meistaradeildina.

„Maður verður að vera bjartsýnn. Það er enginn tilgangur að fylgjast með þessu ef maður er ekki bjartsýnn. Mér finnst reyndar ólíklegt að þeir hafi stöðugleikann til að landa þessu en lið tapa formi og ná upp formi og kannski geta þeir náð 'runi' eins og hver annar. Ég skal vera bjartsýnn," sagði Viðar.

Hér að neðan má hlusta á þátt dagsins. Það eru Frumherji, White Fox, Viking gylltur (léttöl) og Domino's sem bjóða upp á þáttinn.