Declan Rice, leikmaður West Ham United, fundaði með Thomas Tuchel, þjálfara Bayern München, í síðustu viku og gekk sá fundur vel en þetta segir Florian Plettenberg, blaðamaður hjá Sky í Þýskalandi.
Englendingurinn er einn eftirsóttasti bitinn á markaðnum í sumar en það er alveg ljóst að hann er á förum frá West Ham.
Félagið ætlar ekki að selja hann á tombóluverði en verðmiðinn er í kringum 100 milljónir punda.
Bayern München er eitt þeirra félaga sem hefur hvað mestan áhuga á Rice. Thomas Tuchel, þjálfari Bayern, hitti Rice í Lundúnum og gekk fundurinn afar vel.
Rice getur vel ímyndað sér að spila fyrir Bayern en félagið er nú að undirbúa tilboð í miðjumanninn.
Arsenal, Chelsea og Manchester United eru einnig áhugasöm um Rice sem spilar sinn síðasta leik fyrir West Ham á miðvikudaginn er liðið mætir Fiorentina í úrslitum Sambandsdeildar Evrópu.
Athugasemdir