Jón Daði Böðvarsson.
„Það er alltaf gaman að koma hingað í annað andrúmsloft og hitta strákana. Það eru tveir spennandi leikir framundan og ekkert nema eftirvænting," sagði Jón Daði Böðvarsson við Fótbolta.net fyrir landsliðsæfingu í dag.
Jón Daði yfirgaf herbúðir Reading í sumar og gekk til liðs við Millwall sem spilar einnig í Championship deildinni á Englandi. Hann hefur fengið fá tækifæri í byrjun tímabils í deildinni.
Jón Daði yfirgaf herbúðir Reading í sumar og gekk til liðs við Millwall sem spilar einnig í Championship deildinni á Englandi. Hann hefur fengið fá tækifæri í byrjun tímabils í deildinni.
„Þetta er búið að vera allt í lagi. Þrátt fyrir lítinn spiltíma í byrjun þá hefur liðinu gengið framar vonum og við erum að ná í góð stig í erfiðri deild. Það var gott fyrir mig að spila þennan bikarleik og skora tvö mörk og ná í sjálfstraust."
Jón Daði skoraði tvö mörk gegn C-deildarliði Oxford í deildabikarnum í síðustu viku en klikkaði síðan í vítaspyrnukeppni þar sem Millwall tapaði.
„Þetta var týpískur enskur fótbolti. Við vorum 2-0 yfir þangað til á 87. mínútu en þeir jafna og það var sjokk. Ég átti að gera betur í þessu víti en það kemur síðar."
Stuðningsmenn Millwall hafa oft komist í fréttirnar í gegnum tíðina fyrir ranga hluti.
„Þetta er sérstakur klúbbur. Þetta er kannski stór, lítill klúbbur. Stuðningsmennirnir eiga sér sögu fyrir að vera villtir. Ég hef ekki fundið neitt fyrir því. Þeir eru mjög aggressívir á góðan hátt og andrúmsloftið er skemmtilegt. Þetta er no-nosense fótbolti og barningur. Ég finn fyrir trausti hjá þjálfurunum og félaginu þó að ég hafi ekki spilað mikið. Þetta er langt tímabil og ég er spenntur fyrir framtíðinni."
Hér að ofan má sjá viðtalið í heild sinni en þar tjáir Jón Daði sig meira um Millwall og leikstíl liðsins sem og komandi landsleiki gegn Moldavíu og Albaníu.
