„Við erum að reyna ná í 1-2 leikmenn áður en glugginn lokar," segir Davíð Þór Viðarsson, yfirmaður fótboltamála hjá FH, við Fótbolta.net í dag.

„Við erum með stóran og breiðan hóp og í baráttu um að komast í fyrsta lagi í topp sex og svo vonandi gerum við atlögu af topp 3-4 sætunum."

Efstu þrjú sætin gefa Evrópusæti og svo er fjórða sætið í gegnum bikarinn. Ef KA vinnur bikarinn og er ekki á meðal topp þriggja liðanna þá fær fjórða sæti deildarinnar ekki Evrópusæti.

Í leit að hægri bakverði
„Við erum náttúrulega búnir að missa tvo hægri bakverði, bæði Ásta og Hödda (Hörð Inga Gunnarsson). Við erum að reyna fylla í það skarð."

„Við erum líka að skoða markaðinn, ef þetta verða tveir leikmenn þá eru nokkrir möguleikar um stöður ef við finnum réttan leikmann á réttum aldri."

Ekki keyptur sem skammtímalausn
FH-ingar vonast til þess að Flóki verði klár eftir rúma viku. „Það gæti tekið aðeins lengri tíma, við fylgjumst vel með og pössum upp á hann. Við gerðum fína læknisskoðun á honum og erum að sjá hvenær hann getur orðið klár. Ef það tekur 2-3 vikur, þá er það allt í lagi, við erum ekki að kaupa hann sem einhverja skammtímalausn. Hann á að geta hjálpað okkur næstu árin og við þurfum að sjá til þess að veita honum umhverfi þar sem hann getur blómstrað af því að hæfileikarnir eru svo sannarlega til staðar."