Sigrar í Svíþjóð - Dagný bar fyrirliðabandið í sigri
Mynd: Piteå
Mynd: Fótbolti.net - Hafliði Breiðfjörð
Mynd: Piteå
Það voru þónokkrir Íslendingar sem komu við sögu í kvennaleikjum úti í heimi í dag þar sem Hlín Eiríksdóttir og Berglind Rós Ágústsdóttir voru í sigurliðum Piteå og Örebro í sænsku deildinni.
Bæði lið eru á svipuðum slóðum um miðja deild eftir sigrana. Þau sigla lygnan sjó með 23 og 21 stig eftir 16 umferðir.
Hlín leikur með Piteå sem rétt marði AIK á meðan Berglínd Rós er hjá Örebro sem rúllaði yfir Brommapojkarna. AIK og Brommapojkarna deila botnsæti deildarinnar.
Piteå 1 - 0 AIK
Örebro 4 - 0 Brommapojkarna
Dagný Brynjarsdóttir var í byrjunarliðinu og bar fyrirliðabandið hjá West Ham í æfingaleik gegn Charlton í dag. Hamrarnir lentu undir snemma leiks en náðu að jafna í upphafi síðari hálfleiks og gera svo sigurmark undir lokin. Dagný spilaði allan leikinn.
Gunnhildur Yrsa Jónsdóttir kom þá inn af bekknum í óvæntum sigri Orlando Pride á útivelli gegn toppbaráttuliði San Diego Wave. San Diego var betra liðið í leiknum en hin 39 ára gamla Erin McLeod átti stórleik á milli stanga Orlando.
Gunnhildur spilaði síðasta hálftíma leiksins og stóð Orlando uppi sem sigurvegari, 0-1. Liðið er með 18 stig eftir 15 umferðir, þremur stigum frá umspilssæti.
Í Danmörku kom Emilía Ásgeirsdóttir inn af bekknum í góðum sigri Nordsjælland, sem er með þrjú stig eftir tvær umferðir.
Að lokum vann Vålerenga í Noregi og Bröndby í Danmörku en Ingibjörg Sigurðardóttir og Kristín Dís Árnadóttir voru ekki með.
Charlton 1 - 2 West Ham
San Diego Wave 0 - 1 Orlando Pride
Kolding 0 - 3 Nordsjælland
Avaldsnes 0 - 3 Vålerenga
Bröndby 2 - 1 Sundby
Mynd: Fótbolti.net - Hafliði Breiðfjörð
