„Þetta var mikilvægur leikur fyrir okkur, að hafa unnið þennan leik í dag. Við erum að fara í erfiðan kafla núna, næstu 5 leiki. Þannig að ná í 3 stig í dag er rosalega mikilvægt." Sagði Dean Martin aðstoðarþjálfari ÍA eftir að liðið hans vann 1-0 sigur á KA í dag. Þessi úrslit skilar Skagamönnum upp í 4. sætið fyrir skiptingu, sem er besti árangur ÍA í 12 leikja deild í 22 leikjum.
Lestu um leikinn: ÍA 1 - 0 KA
„Við erum mjög stolt af þessu. Þetta er það sem við erum búin að undirbúa okkur fyrir í allan vetur að vera þar sem við erum stödd núna og við verðum bara að halda áfram."
Rúnar Már Sigurjónsson var hetja Skagamanna í dag, þar sem hann skoraði eina mark leiksins. Hann er búinn að vera mest megnis frá allt tímabilið vegna meiðsla en kom sterkur inn í dag.
„Það er frábært að fá svona karakter inn, hann á skilið þetta mark í dag. Hann er búinn að æfa eins og svín og koma sér í þetta stand sem hann er í núna í dag. Hann spilaði mjög vel fyrir okkur í dag."
Arnór Smárason hefur einnig verið frá vegna meiðsla. Hann kom inn á í uppbótartíma í dag.
„Staðan á honum er þannig að hann tekur þetta smátt og smátt, eitt skref í einu. Við erum að reyna að koma honum aftur í gang bara eins og allir sem eru búnir að vera meiddir. Smátt og smátt þá gefum við þeim nokkrar mínútur og þeir æfa aðeins meira."
Þrátt fyrir að vera nýliðar í deildinni er ÍA í harðri Evrópu baráttu. Dean er þó rólegur og vill ekki fara fram úr sér.
„Það er bara einn leik í einu. Það eru rosalega erfið lið sem við munum spila á móti, við verðum að vera skipulagðir og undirbúnir. Núna er nægur tími á milli leikja þannig við verðum bara að undirbúa okkur vel."
