Hannes átti góðan leik í dag.
„Það var ánægjulegt að klára þetta með fínum sigri og halda loksins hreinu. Sólin skín og það er hægt að leyfa sér að brosa eftir erfiðar vikur," sagði Hannes Þór Halldórsson markvörður Vals eftir 2 - 0 sigur á HK í lokaumferð Pepsi Max-deildarinnar í dag.
Lestu um leikinn: Valur 2 - 0 HK
„Við förum alltaf á völlinn til að vinna en okkur fannst extra mikilvægt núna að enda þetta á jákvæðum nótum þó það væri ekkert undir. Bæði fyrir sálartetrið og til að reyna að búa til smá momentum fyrir næsta tímabil."
Það var hellingur að gera hjá Hannesi í leiknum í dag enda liðið eins og gatasigti varnarlega.
„Við vorum oft á tíðum galopnir í þessum leik og ýmislegt sem mátti betur fara. En við sluppum með þetta núna og ég er ánægður með að halda hreinu og ánægður með stigin."
Valur getur þakkað Hannesi fyrir að hafa ekki fengði á sig mark í dag því hann varði oft á tíðum alveg frábærlega.
„Takk fyrir það. Ég reyndi að vera fyrir því sem kom á markið eins og ég reyni alltaf. Það tekst ekki alltaf en það tókst í dag og var fínn dagur."
