Van Nistelrooy: Ekki síðra en hjá Real Madrid

„Ég er spenntur og stoltur af því að stýra Leicester City í ensku úrvalsdeildinni. Ég átti góðar viðræður við eigandann og stjórnarmenn. Við erum allir saman á blaðsíðu og spenntir fyrir því að vinna saman," segir Van Nistelrooy.

„Í gær hitti ég leikmenn, starfsteymið og alla hérna í fyrsta sinn. Ég fundaði með leikmönnum og við ræddum stöðu okkar, áskorunina framundan og hvað þarf að gera til að koma okkur úr þessari stöðu."

„Það er erfitt að gera miklar breytingar á tveimur dögum en við erum byrjaðir að gera breytingar. Breytingar á leikstíl, æfingum, strúktúrnum. Við viljum byggja aftur upp lið sem getur barist í þessari deild."

Rosaleg viðbrögð
Van Nistelrooy náði góðum úrslitum á meðan hann var bráðabirgðastjóri Manchester United og vann meðal annars Leicester tvisvar.

„Það var góður kafli. Hann var stuttur og fjörugur en ég var ánægður að geta hjálpað við að rétta skútuna við. Liðið er komið á betri veg og það er gaman að sjá. Vonandi get ég hjálpað Leicester á sama hátt," segir Van Nistelrooy sem fékk gríðarleg viðbrögð eftir gengi United undir hans stjórn.

„Ég var undrandi á öllum áhuganum sem ég fékk eftir þetta. Þetta voru bara fjórir leikir. Hjá PSV stýrði ég heilt tímabil og vann titla. Ég fékk alls ekki svona viðbrögð. Ég gat rætt við nokkra aðila núna og valið á milli."

Ekki síðra æfingasvæði en hjá Real Madrid
Leicester á nýtt og glæsilegt æfingasvæði og Van Nistelrooy er heillaður af þeirri aðstöðu sem er í boði.

„Það sögðu mér allir hversu góð aðstaðan er hérna. Maður þarf að sjá þetta með eigin augum til að trúa þessu. Fyrir ári síðan var ég í tíu daga með Carlo Ancelotti hjá Real Madrid. Aðstaðan er svipuð, það er bara annað merki! Þetta er frábært umhverfi fyrir leikmenn og unga leikmenn að þróast og verða betri."