Hakan Calhanoglu skoraði eina mark leiksins undir lok fyrri hálfleiks og tryggði Inter sigur.

Barcelona hefur því tapað tveimur leikjum af fyrstu þremur leikjum sínum.

Dómgæslan í leik liðsins gegn Inter var þó vafasöm á köflum. Mark var tekið af Börsungum á á 66. mínútu leiksins.

Ousmane Dembele átti fyrirgjöf sem fór af Ansu Fati og til Pedri sem skoraði. VAR tók markið af þar sem boltinn átti að fara í höndina á Fati og slapp Inter með skrekkinn, en sóknarþungi Börsunga var gríðarlegur og hafði liðið átt skot í stöng stuttu áður.

Seint í uppbótartíma vildi Barcelona fá vítaspyrnu er Denzel Dumfries handlék knöttinn innan teigs og kom í veg fyrir að Fati gæti skapað sér gott færi. VAR gaf ekki vítið og fór því Inter með sigur af hólmi.

Spænska félagið var allt annað en sátt við dómgæsluna í leiknum og er nú að undirbúa formlega kvörtun til UEFA.