„Mér fannst við eiga helling inni í fyrri hálfleiknum þó þær hafi skorað þetta ódýra mark. Mér fannst við vera vel inni í leiknum og áttum alveg möguleika á að skora. Svo var auðvitað erfitt að vera manni færri og fá svo annað ódýrt mark á sig. Það var aðeins of mikið fyrir hópinn og við sköpuðum lítið í seinni hálfleik,“ sagði Vilhjálmur Kári Haraldsson, annar þjálfari Augnabliks, í samtali við Fótbolta.net eftir 2-0 tap gegn Haukum á útivelli.
Lestu um leikinn: Haukar 2 - 0 Augnablik
Eins og oft áður í sumar var lið Augnabliks að spila fínan fótbolta úti á velli, án þess þó að ná að skapa sér hættuleg færi eða skora mörk.
„Við erum að prófa ýmislegt,“ sagði Vilhjálmur um sóknarleikinn, en bakvörðurinn Kristjana Sigurz var til að mynda að spila framarlega á vellinum í kvöld og gerði það ágætlega.
„Við trúum því að það komi einhver á óvart í lokin og skori svolítið af mörkum.“
Augnablik situr í 6. sæti með 14 stig en pakkinn fyrir neðan þær er þéttur og bara tvö stig niður í fallsæti. Aðspurður um hvort Vilhjálmur hefði áhyggjur af því að Augnablik gæti sogast niður í fallbaráttuna svaraði hann:
„Ég held það hafi náttúrulega allir áhyggjur af því en við höldum ótrauð áfram og reynum að bæta okkar leik. Við höfum ekki fengið mörg mörk á okkur og höfum verið að spila ágætlega úti á vellinum. Við höldum svo áfram að vinna í því að skora mörk. Það hlýtur að detta hjá okkur í næstu leikjum.“
Nánar er rætt við Vilhjálm Kára í spilaranum hér að ofan en hann er meðal annars spurður um rauða spjaldið sem Telma Ívarsdóttir fékk og markmannsmál Augnabliks.
