Eysteinn Húni Hauksson.
Eysteinn Húni Hauksson er tekinn tímabundið við liði Keflavíkur í Pepsi-deildinni. Eysteinn hefur verið aðstoðarþjálfari Keflavíkur en Guðlaugur Baldursson, þjálfari liðsins, lét af störfum í vikunni.
Lestu um leikinn: Víkingur R. 1 - 0 Keflavík
Eysteinn stýrði Keflavík í fyrsta sinn í kvöld, í leik gegn Víkingi í Fossvogi. Leikurinn tapaðist 1-0 og er Keflavík enn án sigurs í Pepsi-deildinni eftir 12 leiki spilaða.
„Ég er svekktur fyrir hönd strákanna, þeir hlupu úr sér lungun," sagði Eysteinn eftir leik.
Keflavík hefur ekki skorað deildarmark frá 4. júní.
„Ef menn hafa ekki trú á þessu þá geta þeir hætt þessu, en þetta kemur - þessir strákar mæta á hverjum degi tilbúnir og leggja sig fram. Við ætlum að snúa þessu við."
„Við höfum unnið nokkuð í sóknarleiknum síðustu tvö ár, en það þarf ekki að vinna neitt í honum, menn þurfa bara að fara til að skora, það er mín skoðun. Þetta var andlegt frekar en eitthvað taktískt í dag, að við skyldum ekki skora mörk."
„Það er ekkert að andanum í hópnum, það vantar einhverja drullusokka ef eitthvað er. Þetta eru frábærir náunga og þeir koma dag eftir dag í þessu mótlæti, í þessu veðri. Þeir verða bara að halda áfram og gefast ekki upp."
Aðspurður sagðist Eysteinn ekki vita hvort hann yrði áfram í næsta leik en viðtalið er í heild sinni hér að ofan.
