Guðmundur er búinn að vera flottur með Fram í sumar.
Guðmundur Magnússon, fyrirliði Fram var ekki sáttur með úrslitin í kvöld og fannst eins og sínir menn hefðu ekki trú á verkefninu.
Lestu um leikinn: ÍA 2 - 0 Fram
Fram tapaði fyrir toppliði ÍA með tveimur mörkum gegn engu og Guðmundi fannst eins og liðið hefði gefist upp eftir fyrra markið.
„Það var bara, fyrir mér leit þetta bara þannig út að menn hefðu ekki trú á þessu. Fínn fyrri hálfleikur, þegar við spiluðum þá gerðum við það vel, vorum of værukærir stundum. Seinni hálfleikurinn, fáum á okkur mark og það er eins og menn hafi aldrei fengið mark á sig áður, allir detta niður. Gerir það að verkum að þeir komast í 2-0. Þetta er bara óskiljanlegt, við förum yfir hlutina daginn fyrir leik í hvert einasta skipti. Ég veit ekki hvað þarf að gera til að menn nái þessu, ” sagði Guðmundur.
Fram hefur verið að skora mikið í undanförnum leikjum en misst þá niður í jafntefli og í dag var eins og liðið hefði gefist upp eftir fyrra markið.
„Þetta er bara eitthvað sálrænt, ég veit ekki hvað er í gangi. Það er eins og við þurfum að fá okkur mark til þess að komast í gang. Að þessu sinni gekk það ekki en við þurfum heldur betur að taka okkur saman í andlitinu ef við ætlum að gera eitthvað í þessari deild, ” sagði Guðmundur.
Spilamennska Fram í sumar hefur verið góð og margt gott sem er hægt að byggja á upp á framhaldið.
„Ég sagði það í vikunni í eitthverju viðtali að þetta eru ungir strákar sem eru að spila og þeir fá fullt hrós fyrir það sem þeir eru að gera og það er ekkert við þá að sakast. Við þurfum að byggja á þetta og halda áfram, bara bæta okkur,” sagði Guðmundur.
Viðtalið við Guðmund má sjá í heild sinni hér að ofan.
