,,Skiptir voðalega litlu máli þegar leikurinn er búinn og endar jafntefli
Leiknir átti að fá vítaspyrnu í leiknum þegar brotið var á Vuk undir lok fyrri hálfleiks. Sólon segir þá enga innbyrðiskeppni vera milli sín og Vuk varðandi markaskorun.
„Gríðarlega svekkjandi að missa þetta niður. Við vorum flottir í fyrri en ekki nógu góður í seinni," sagði Sólon Breki Leifsson, leikmaður Leiknis R., eftir markajafntefli gegn Þór í Lengjudeildinni í dag.
Lestu um leikinn: Leiknir R. 3 - 3 Þór
Sólon kom að öllum þremur mörkum Leiknis í leiknum. Er hann sáttur með sína frammistöðu eða er það eina sem skiptir máli að vinna leikinn.
„Já það er eina málið. Ég var fínn í fyrri hálfleik og þetta voru fín hlaup. Þetta skiptir voðalega litlu máli þegar leikurinn er búinn og endar jafntefli."
Leiknismenn vildu í tvígang fá vítaspyrnu í leiknum og í bæði skiptin var það Vuk Oskar Dimitrijevic sem féll í teignum. Fannst framherjanum þetta vera víti?
„Mér fannst fyrsta brotið vera pjúra víti en sá ekki seinna. Egill [dómari] var fínn í þessum leik og hef ekkert út á hann að setja."
Sólon var næst settur í erfiða stöðu og var beðinn um sitt mat á því hvort hann sem framherji hefði viljað fá seinna gula spjaldið þegar Guy Smit, markvörður Leiknis, braut á Guðna Sigþórssyni og víti var dæmt.
„Er það ekki bara nei? sagði Sólon og hló.
Vuk hefur nú skorað sjö mörk í deildinni sem er tveimur meira en Sólon. Eru þeir í einhverri keppni innbyrðis?
„Nei ekki neinni, við erum allir bara að gera okkar besta og fyrir mér skiptir það engu hvort að ég skori, Vuk skori eða Bjarki skori."
Hvað þarf Leiknir að gera öðruvísi en liðið gerði í dag í næsta leik gegn Vestra?
„Við þurfum að halda fókus út leikinn og ekki missa dampinn þó að aðeins sé verið að leggja á okkur. Við þurfum að læra að halda forystu."
„Já ég er klár, mjög spenntur að fara vestur," sagði Sólon að lokum aðspurður hvort hann væri klár í næsta leik gegn Vestra á miðvikudag.
Viðtalið í heild sinni má sjá í spilaranum hér að ofan.
Athugasemdir
