Valur gerði sér ferð til Akranes í dag og vann þar góðan 2-4 sigur á ÍA.
Lestu um leikinn: ÍA 2 - 4 Valur
Valsmenn komust í 3-0 í fyrri hálfleik en ÍA komst aftur í leikinn með tveimur mörkum. Valur kláraði hins vegar leikinn í uppbótartíma.
„Mjög ánægður með sigurinn. Mér fannst við frábærir í fyrri hálfleik, spiluðum þá sundur og saman. Það var nánast eitt lið á vellinum. Skoruðum þrjú mörk og hefðum geta skorað fleiri mörk. Vorum klaufalegir á síðasta þriðjungi þar sem við gátum slátrað þessum leik. En Skagamenn gefast aldrei upp og við töluðum um það í hálfleik. Þeir komu út í seinni hálfleikinn grimmi og við vorum ekki klárir," sagði Heimir.
Heimir var spurður út í það hvort hans menn hafi verið orðnir þreyttir í restina á leiknum.
„Nei, ég held að menn hafi ekki verið þreyttir heldur værukærir. Menn komu ekki nógu vel stemmdir í seinni hálfleik og við vorum undir í baráttunni. Menn voru að hoppa upp úr tæklingum og á erfiðum útivelli eins og hér á Skaganum þá er voðin vís."
Skagamenn vildu fá vítaspyrnu en Heimir vildi ekki mikið tjá sig um það atvik.
„Ég náttúrlega sá þetta ekki en ég held að það sé ágætt að anda bara með nefinu og skoða þetta áður en ég fer að taka einhverjar ákvarðanir. Dómgæslan var mjög fín og það var jákvætt að Gummi var ekki að láta sífelld öskur Skagamanna hafa áhrif á dómgæsluna."
Athugasemdir
