Heimir Guðjónsson þjálfari FH var ánægður með úrslit kvöldsins eftir að liðið hans vann ÍA 3-1 á útivelli.
Lestu um leikinn: ÍA 1 - 3 FH
„Þetta var bara góð liðsheild, menn voru tilbúnir í þetta. Þegar menn mæta upp á Skaga þá þarftu að vera með grunnatriði leiksins á hreinu. Mér fannst við vera með það á löngum köflum, svo náðum við líka bara að spila fínan leik og fínar sóknir, góðir í 'tranistion'. Við misstum þá tvisvar í gegn og Matthias (Rosenörn) bjargaði okkur, en svona fyrir utan það hélt varnarleikurinn vel og sóknarleikurinn er að verða betri," sagði Heimir.
FH liðið var á tímum nálægt því að fá mörk á sig en Matthias Rosenörn stóð vaktina vel í markinu. Heimir segir að það auki sjálfstraust liðsins þegar þeir ná að refsa fyrir að andstæðingarnir nýta ekki sína sénsa.
„Færið hans Gísla (Laxdal) var gott, og seinni varslan var ósköp eðlilega varsla. Hann átti alltaf að taka það, en hann stóð sig vel í dag. Auðvitað var það gott að skora strax á eftir, við vorum öflugir. Kjartan Kári var mjög öflugur þarna vinstra megin og sérstaklega í 'transition', og við náðum að nýta okkur það."
FH liðið hefur verið upp og niður í úrslitum en hafa almennt séð ekki sýnt mikið af vondum frammistöðum. Hvað er það þá sem tengir saman frammistöðu og úrslit í kvöld?
„Það að við vorum ekki að gefa neina trúðamörk. Ef að þú tekur mótið í heild sinni, þar sem við byrjum á móti Stjörnunni. Það var eitthvað draugamark, og við áttum að fá víti, svo förum við vestur að spila á móti Vestra. Töpum þar sanngjarnt, lélegasti leikurinn okkar, svo allt í einu kemur bara í ljós að Vestri er bara með helvíti gott lið og hafa sýnt það. Svo förum við á móti KR og spilum góðan leik, erum einum færri í svona 40 mínútur, plús. Þannig að við höfum náð í frammistöður og hlutirnir hafa ekki verið að falla með okkur. Þú skapar þína eigin heppni í þessu, og við gerðum það í dag með góðri liðs frammistöðu og við þurfum að halda því áfram."
Viðtalið má sjá í heild sinni í spilaranum hér fyrir ofan.
