Alvaro Morata kom inn af bekknum og skoraði eina mark Spánverja í 1-1 jafntefli gegn Þýskalandi í kvöld.
Þetta var annað mark í öðrum HM leik Morata með Spáni en hann kom einnig inn af bekknum í stórsigrinum gegn Kosta Ríka í fyrstu umferð og skoraði.
Hann varð þar með fyrsti leikmaður spænska liðsins til að skora í fyrstu tveimur HM leikjunum sínum komandi inn af bekknum og aðeins þriðji til að gera þetta í sögu HM - eftir Memphis Depay 2014 og Ricardo Pelaez 1998.
„Þegar maður byrjar á bekknum er mikilvægt að vera einbeittur þegar röðin er komin að manni svo maður geti haft jákvæð áhrif til að hjálpa liðinu. Þetta var erfiður leikur gegn virkilega gæðamiklum andstæðingum - hérna mættust tvö lið sem gætu spilað í undanúrslitum eða úrslitaleik á HM," sagði Morata við BBC One að leikslokum.
„Þjálfarinn sagði mér að spila eins og ég geri vanalega: Halda boltanum, hjálpa liðinu og ráðast á auðu plássin. Þetta er það sem minn leikur snýst um og það sem ég gerði í þessum leik og öllum öðrum leikjum."
Spánn er með fjögur stig og frábæra markatölu eftir tvær umferðir en er ekki búið að tryggja sig áfram í útsláttarkeppnina. Spánverjar mæta Japönum í næstu umferð og nægir jafntefli til að tryggja sér toppsæti E-riðils.
„Japan eru erfiðir andstæðingar, þeir hlaupa mikið og eru með taktísku hliðina á hreinu. Þetta verður erfiður leikur en svona er það á HM. Þetta eru allt erfiðir leikir."
