Áslaug Munda Gunnlaugsdóttir.
Áslaug Munda Gunnlaugsdóttir mætti í viðtal eftir æfingu landsliðsins í dag Fürth í Þýskalandi í dag.
Þessi efnilegi leikmaður er núna á leið á sitt fyrsta stórmót með liðinu.
„Við höfum haft góðan tíma núna til að efla hópinn, bæði fótboltalega séð og félagslega. Það er búið að fara mjög vel um okkur í Þýskalandi, voðalega þægilegur staður,” segir hún um tímann með landsliðinu.
Áslaug Munda hefur verið að leysa stöðu vinstri bakvarðar með landsliðinu. Hvernig er það samanborið við að vera á kantinum?
„Mér finnst ekkert að því. Þetta er bara gaman. Það er fínt að fá að taka þátt í varnarleiknum. Það er allt öðruvísi en að vera á kantinum, en svipað að einhverju leyti líka. Það eru lengri hlaup en ég er vön því - það er mjög gaman.”
Á æfingunni var hún að dekka Sveindísi Jane Jónsdóttur sem er alls ekki auðvelt verkefni.
„Það er ekki einfalt og ég þarf að vera mjög passív til að ná að verjast henni. Það er mjög góð áskorun og ég fæ aukið sjálfstraust ef ég næ að halda í við hana.”
Hér að ofan má sjá viðtalið í heild sinni.
